Polo tenro con limón, allo e xenxibre

Esta receita é para os que din que non lles gusta a carne de polo porque é moi seca… Con este método ides lograr uns filetes ben tenros e saborosos. Xa sabedes que non como moita carne, pero a de polo é a miña favorita: botádelle un ollo a estas albóndegas de polo con ananás, polo rebozado á moda xaponesa ou este guiso de polo ao viño tinto.

Ingredientes (para 4 persoas)

4 ou 5 dentes de allo, ben picados

3 culleres de zume de limón

5 culleres de aceite de oliva

2 culleriñas de xenxibre fresco, relado fino

1 feixe pequeno de coandro fresco

1 culleriña de cúrcuma (opcional)

1 culleriña de sementes de coandro moídas

1/2 culleriña de caiena moída

2 peitugas de polo, cortadas transversalmente.

1. Nun recipiente fondo, botamos o allo, o zume, 3 culleres de aceite, o xenxibre, o coandro moído, 4 ou 5 follas de coandro fresco picado, a cúrcuma, a caiena e o sal.

2. Metemos o polo nunha bolsa grande e resistente, botamos a mestura do paso anterior, pechamos e esmagamos coas mans para repartir ben o mollo.

3. Deixámolo repousar no frigorífico durante 2 horas.

4. Nunha pota grande, botamos 2 culleres de aceite, e engadimos o polo tal e como saia da bolsa. Co lume alto, pasamos os filetes 1 ou 2 minutos por cada lado.

5. Tapamos a pota, baixamos o lume ao mínimo e deixamos cociñar (sen levantar a tapa) uns 10 minutos.

6. Retiramos do lume e deixámolo tapado outros 15 minutos.

7. Servimos acompañado dunhas follas de coandro fresco picado.

Tenro, tenrísimo

Deixa unha resposta

O teu enderezo electrónico non se publicará Os campos obrigatorios están marcados con *