Estamos de volta cas larpeiradas, desta vez temos un queique de orixe norteamericana: o banana bread, ou queique de plátano. Xa fixéramos un semellante o ano pasado, pero desta vez a receita e máis clásica, e tamén máis lixeira. É unha receita que gusta moito aos cativos, e tamén vai moi ben para aproveitar ese plátanos ennegrecidos!
Podedes comer rebandas do queique, ou tostalo e engadirlle manteiga por riba. Tamén uvas pasas, un chisco de ron, anaquiños de chocolate…ao gusto de cada un!
Ingredientes:
280 gramos de fariña de trigo
200 gr de azucre
110 gr de manteiga
4 plátanos pequenos, maduros
2 ovos
80 ml. de leite enteiro
1 culleriña e media de zume de limón
1 culleriña de bicarbonato sódico
1 culleriña de aroma de vainilla
Un belisco de sal
- Prequentamos o forno a 180º
- Nun bol botamos a manteiga. Quecemola no microondas ata que abrande pero non derreta. Engadimos o azucre e batemos ca batedora ata que sexa unha crema uniforme,
- Pelamos os plátanos e esmagámolos cun garfo.
- Nun vaso, mesturamos o zume de limón e o leite, deixamos repousar.
- No bol do paso 1 botamos os ovos, os plátanos, a vainilla e a mestura do paso 3. Batemos ben ca batidora.
- Nun prato fondo mesturamos a fariña co bicarbonato e mailo sal.
- Engadimos aos poucos á masa.
- Enchemos o molde, engraxándoo se fai fala. Eu usei o de silicona, así que acortei este paso 😉
- Cocemos no forno durante 50 minutos, aproximadamente, ata que estea enchido e ben dourado por riba.
Que aproveite!
