Cinco trucos para facer maonesa

A maonesa é un dos mollos máis populares, e sempre fai avío tela na casa. Seguindo ca nosa popular serie “Cinco trucos” :D, hoxe temos unha pequena lista para que nos saia mellor. Desta vez quero agradecerlle á miña nai a súa colaboración, que a maonesa que sae na foto é súa (e estaba boísima!). Outra receita feita por ela é a dos chocos, por se lle queredes botar un ollo.

Un detalle curioso é que o seu nome é un xentilicio: a teoría máis estendida di que os franceses descubriron este mollo en Maó, Menorca, ao ir alí a botar aos ingleses, que daquela dominaban a illa. Un soldado francés levou a receita a Francia e o resto… é historia!

  1. Usar un vaso estreito no canto dun bol. A súa forma fai que o aceite baixe a modiño, o que axuda a que non corte.
  2. O ovo ten que estar a temperatura ambiente, e é o primeiro ingrediente que vai ao vaso. Despois o aceite e logo o zume de limón/vinagre.
  3. O aceite de oliva emulsiona máis facilmente ca o de xirasol. Se queredes que non teña sabor intenso, usade un refinado e de pouca acidez.
  4. Para bater, hai que introducir o brazo da batedora ata o fondo, e unha vez que estea colocado, non movelo (mentres batemos) ata que a maonesa estea feita. Entón podemos levantalo, aos poucos.
  5. A maonesa é a base para moitos mollos, e admite moitos ingredientes para adobala. Podedes probar a mesturala cun pouco de mostaza, de wasabi, de chipotle ou de allo, seguro que está deliciosa!

Deixa unha resposta

O teu enderezo electrónico non se publicará Os campos obrigatorios están marcados con *